Nytt ph.d.-kurs er ope for søking
Det andre kurset i ph.d.-programmet «Utdanning, språk og kultur» går av stabelen til hausten. Innhaldet er grunnleggande for ei forskarutdanning; det handlar nemleg om vitskapsteori, metodologi og etikk.
I midten står HVO-professor og emneansvarleg Jonas Gamborg Lillebø, flankert av nokre av kollegaene som underviser på det komande ph.d.-kurset (f.v.): professor Siv M. Gamlem, professor Ellen Lexerød Hovlid, professor Wenke Mork Rogne og førsteamanuensis Erlend Walseth.
Våren 2025 byrja ph.d.-tilbodet Utdanning, språk og kultur ved Høgskulen i Volda (HVO). Dette er HVOs første doktorgradsprogram i humanistiske fag og utdanningsvitskap.
- Les om oppstarten her: – Ein merkedag for høgskulen
Det andre emnet i ph.d.-programmet har tittelen «Vitskapsteori, metodologi og forskingsetikk» (med koden DRUSK902). Fyrste kurs-samling vert i månadsskiftet september/oktober og den andre i starten av november.
Emnet gjev innføring i humanistisk og samfunnsvitskapleg kunnskapsdanning og metodeforståing så vel som sentrale etiske sider ved vitskapleg arbeid. I vitskapsteori vert det mellom anna lagt vekt på hermeneutikk, positivisme og konstruktivisme.
Delen om metodologi vert på eit overordna nivå der vi ser på korleis ulike metodar heng saman med dei vitskapsteoretiske posisjonane. Meir konkret innføring i viktige forskingsmetodar kjem i emnet DRUSK903, som vert tilbode vinteren 2026 – og med fordjuping i valemna deretter.
I arbeidet med etikk er målet å utvikle refleksjon kring eiga forskarrolle og dei etiske utfordringane som er knytte til ulike vitskapsteorietiske posisjonar.
Målgruppe
For dei som er tekne opp i ph.d.-programmet «Utdanning, språk og kultur», er emnet obligatorisk. Men andre interesserte er også velkomne til å søkje om plass i kurset, og dei som er kvalifiserte, vil konkurrere om dei disponible plassane etter denne prioriteringslista:
- Kandidatar på ph.d.-programmet «Utdanning, språk og kultur»
- Kandidatar i andre ph.d.-program
- Tilsette ved Høgskulen i Volda
- Andre eksterne (etter vurdering av emneansvarleg)
Undervisarar og tema
Professor Jonas Gamborg Lillebø er emneansvarleg, men han deler på gjennomføringa med fleire kompetente kollegaer frå ulike fagmiljø og på tvers av avdelingane ved HVO. Dette er med og framhevar den tverrfaglege innretninga og syner at ph.d.-utdanninga er ei satsing for heile høgskulen.
Mellom tematikkane kan nemnast at Knut-Willy Sæther skal undervise om «Positivisme, fallibilisme, pragmatisme og kritisk realisme» og Anemari Neple om «Tolking og overtolking». Mathias Nygaard er ansvarleg for ei økt om «Forskerens gjerning, epistemisk ydmykhet og metodemangfold», medan Erlend Walseth og Jonas G. Lillebø vil drøfte ulike rasjonalitetsformer, makt og verdiar med kandidatane.
Den andre samlinga har hovudfokus på etiske utfordringar knytte til det vitskaplege arbeidet. Mellom anna vil Ellen Lexerød Hovlid der ta føre seg forskingsetikklova, medan Siv M. Gamlem og Wenke Mork Rogne samarbeider om temaet «Sårbare informantar». Som i alle ph.d.-kursa vert det også sett av god tid til framlegg frå deltakarane og diskusjonar.
Meir informasjon
Viktige opplysningar om mellom anna opptakskrav, søknadsfrist, samlingsdatoar, arbeidskrav og vurderingsordning finn de her: https://www.hivolda.no/studietilbod/vitskapsteori-metodologi-og-forskingsetikk/haust
