Presenterer internasjonale funn om tilbakemelding for læring
Elevperspektivet i tilbakemeldingar som fremjar læring, er temaet for ein ny spesialpublikasjon. HVO-forskar Pernille Fiskerstrand har leia redaktørgruppa som presenterer studiar med viktige funn for utdanningsforsking.
Førsteamanuensis Pernille Fiskerstrand (t.h.) og professor Wenke Mork Rogne har redigert ein ny publikasjon med forsking på elevstemmene i vurdering for læring. Foto: HVO / Steinarr Sommerset.
Tidsskriftet Frontiers in Education tek føre seg internasjonal forsking innanfor pedagogikk og utdanningsvitskap. Nyleg kom tidsskriftet ut med ei spesialutgåve med tittelen «Student voices in formative assessment feedback».
Førsteamanuensis Pernille Fiskerstrand ved Institutt for språk og litteratur på Høgskulen i Volda (HVO) leier den internasjonale redaktørgruppa for utgivinga. I redaksjonen har Fiskerstrand hatt med seg HVO-kollega og professor Wenke Mork Rogne, Fabienne van der Kleij (ACER, Australia) og Paul Rogers (UCSB, USA).
Forskinga som blir presentert i publikasjonen, tek føre seg elevar og studentar sine opplevingar og kjensler knytte til tilbakemelding som fremjar læring.
– Forskinga på vurdering for læring har vakse enormt dei siste åra. Samtidig har vi mangla forsking på elevstemmene i denne typen vurdering. Derfor valde vi denne inngangen for spesialutgåva, forklarer Fiskerstrand.
Verdifull innsikt om kva barn og unge lærer best av
I Editorial-artikkelen (den redaksjonelle kommentaren) til utgivinga samanfattar Fiskerstrand og medredaktørane korleis dei ni vitskaplege artiklane bidreg med verdifull ny innsikt på fagområdet.
Dette er mellom funna i dei ulike studiane:
- Elevar og studentar ønskjer tilbakemeldingar som er klare, forståelege, retta inn mot vidare arbeid og formidla gjennom dialog med ein lærar eller medelev som dei stolar på.
- Tilbakemeldinga må byggje på vurderingskriterium som elevar og studentar har fått byggje forståing for gjennom varierte strategiar i undervisninga, og dette vil også føre til at dei har større tiltru til vurderinga.
- Elevar og studentar opplever vurderinga som meir læringsfremjande når dei sjølve er aktive i vurderinga, og meir autonomi i prosessen blir viktigare dess eldre dei er.
- Aktivt engasjement i formative vurderingspraksisar fremjar også sjølvregulering, og det gjer det lettare for læraren å gjere tilpassingar til individuelle behov.
- Elevar og studentar kan i visse tilfelle føretrekkje formativ vurdering frå jamaldringar, men det føreset at vurderingskriteria er godt implementerte i klasserommet. Vurdering frå medelevar eller medstudentar blir også løfta fram som eit godt reiskap til sjølvregulering, dersom det blir arbeidd med på gode måtar.
- Elevar og studentar stolar på tilbakemeldingar som er genererte av kunstig intelligens (KI). Denne tilbakemeldinga blir vurdert som god fordi ho treffer elevane eller studentane der dei er i prosessen, og tilbyr persontilpassa tilbakemeldingar. KI-generert tilbakemelding kan også engasjere studentane gjennom dialog. Samtidig kan ikkje KI-tilbakemelding erstatte den menneskelege intelligensen når det gjeld kjenslemessige behov eller mellommenneskelege relasjonar.
Fleire HVO-forskarar bak artiklane
Mellom studiane i publikasjonen finn vi også artiklar skrivne av forskarar ved HVO.
Bidraget «Same assignment—two different feedback contexts: lower secondary students’ experiences with feedback during a three draft writing process» er skrive av førsteamanuensis Synnøve Heggedal Moltudal og professor Siv M. Gamlem, saman med Meerita Segaran (USN) og Irina Engeness (HiØ).
Gamlem står også for oversiktsstudien «Students' perceptions and outcome of teacher feedback: a systematic review» saman med Christian Brandmo (UiO). Les meir om denne her (hivolda.no).
– Det har vore veldig lærerikt å arbeide med desse artiklane, og vi er stolte av resultatet. Sjølvsagt var det ekstra kjekt at HVO-forskarar ville publisere der, seier Fiskerstrand.
Som leiar av redaktørgruppa for spesialutgivinga meiner Fiskerstrand at resultata frå desse studiane tilfører viktige bidrag til forskingsfeltet:
– Spesielt korleis elevane stolar på tilbakemeldingar frå KI, samtidig som dei har behov for å bli møtt og sett av menneske dei stolar på. Dette viser korleis teknologien kan avhjelpe og kanskje spare tid, samtidig som blikket og varmen frå eit menneske ikkje kan erstattast.
