Frå forelesing til Grønlandsisen: Volda-studentane som satsar stort

Live Skattum (24), Mari Brønseth (24), Marta Flotve (22) og Frøya Jørgensdatter (21) er alle studentar på bachelorstudiet Friluftsliv og naturguide ved Høgskulen i Volda.

Til våren håper dei å gjere noko dei fleste berre drøymer om: Dei vil gjennomføre ei 600 kilometer lang kryssing av Grønlandsisen – på eiga hand, utan hjelp frå guidefirma.

– Dette blir den lengste turen nokon av oss har gjennomført, men forhåpentlegvis starten på framtida, seier Live.

I desember får dei vite om søknaden vert godkjent og dei får løyve til å gjennomføre ekspedisjonen, og reise til Grønland. Fram til den tid, ligg fokuset på trening og førebuing.

Ein ekspedisjon med røter i Volda

Turen dei planleggjer, er inspirert av både eventyrlyst og studiekvardag. Frå vest til aust, over innlandsisen, skal dei gå i Nansen sine fotspor – med pulkar på opp mot 90 kilo. Det er kaldt, det er krevjande, og det er langt unna ei vanleg studieoppgåve.

– Vi kallar det vår «utvida bacheloroppgåve», smiler Marta. – Vi testar ut i praksis alt vi har lært om planlegging, tryggleik, navigasjon og gruppedynamikk.

Jentene trekk fram både fagleg kompetanse og studiemiljøet i Volda som avgjerande for at dei faktisk tør å satse.

– Studiet her gjev oss ei enorm tryggleik i eigne ferdigheiter, og miljøet er fullt av folk som heiar på kvarandre. Lærarane støttar oss og løftar draumen vår, fortel Frøya.

Friluftsliv som livsstil – og karriere

Alle fire har planar om å jobbe som guidar, og fleire i gruppa siktar seg inn på nettopp polarguide. For å kunne leie slike turar i framtida, må dei også ha personleg erfaring. Grønlandsekspedisjonen er derfor både ein draum og eit karrieresteg.

– For oss er dette ei investering i framtida – ikkje berre ein egotripp, forklarar Mari. – Vi vil vise at unge kvinner kan ta plass i det som framleis er eit mannsdominert yrke.

Trening med dekk og draum under armen

Planlegginga er allereie godt i gang. Dagar blir brukt på sponsorbrev, logistikk, forsikringar og kaloritabellar. Kveldar og helgar går med til styrketrening og dekkdrag – det nærmaste ein kjem å trekke pulk heime i Noreg.

– Vi får mykje gratis trening berre ved å komme oss til forelesing. Nokre av oss har til og med flytta litt lenger unna – mest for å få litt ekstra motbakke, ler Live.

Studiestad som dyrkar draumar

Kva er det med Volda som gjer at fire studentar tør å tenke så stort?

– Volda er ein stad der eventyrlyst blir tatt på alvor. Her møter du folk som vil bu i telt – ikkje nødvendigvis kjøpe hus. Det er rom for å gjere ting litt annleis, seier Mari.

– Det at vi er omgitt av både fjord, fjell og fjellvidder, gjer at du alltid har tilgang på natur. Det er som ein leikeplass for friluftsfolk, legg Marta til.

• Les meir om Studiebygda Volda her.

Ein bodskap til andre studentar

Med ekspedisjonen håpar dei å inspirere andre til å følge eigne draumar – enten det er på isen eller i heilt andre retningar.

– Vi vil vise at du ikkje treng vente til du er “ferdig” med studia eller har fått deg fast jobb. Ver seriøs og vaksen seinare. No er tida for å satse, seier Frøya.

– Og viktigast av alt: Du kjem ikkje til å angre på at du valde eventyret, legg ho til.