FOU-prisen til Institutt for religion, livssyn og kyrkjefag (RLK)
FoU-prisen for 2013 går til Institutt for religion, livssyn og kyrkjefag (RLK). I tildelinga la høgskulestyret vekt på at instituttet har klart å skape eit FoU-miljø som er inspirerande og støttande. Resultatet av dette er stor vitskapleg produksjon gjennom mange år.
Per Magne Aadnanes og Jan Ove Ulstein, to representantar frå Institutt for religion, livssyn og kyrkjefag (RLK).
I dag publiserer alle tilsette ved instituttet vitskapleg. Gjennom støtte, entusiasme og gode samarbeidsmodellar blir yngre og mindre erfarne forskarar dregne inn i eit produserande fellesskap. Forumet FAKK er instituttet sitt månadlege forskarseminar. Der blir alle tilsette inviterte til å leggje fram tekstar i ulike stadium av prosessen fram mot publisering. Seminaret har fungert i over 20 år, og det har vore svært viktig for å inkludere nye i forskingsmiljøet.
Instituttet oppretta i 2001 skriftserien «Kyrkjefag profil», og i år kjem utgjeving nr. 20. RLK-forskarar er også aktive i samarbeid med kollegaer frå andre institusjonar – m.a. som redaktørar for vitskaplege antologiar og tidsskrift.
Dei siste åra har RLK sett i gong forskings¬prosjekt som involverer fleire av dei tilsette. «Secular Norway – religious USA» er eit samarbeid med Historisk institutt ved HVO og St. Olaf College, Northfield, Minnesota, og studentar frå mastergraden i kulturmøte er òg med.
Dette gjev eit bilete av eit produktivt og godt fungerande FoU-miljø som har medverka med fagleg tyngde både nasjonalt og internasjonalt.
Det er andre gongen at eit fagmiljø får FoU-prisen ved Høgskulen i Volda. Første gongen var i 2011. Då fekk Historisk institutt prisen.
