Vidareutdanning (bachelornivå)
Engelsk 1, 1.-7. trinn
Vidareutdanninga er retta mot lærarar i grunnskulen, og kvalifiserer for undervisning i engelsk språk, kommunikasjon og litteratur/kultur.
- Start:
- Haust
- Omfang:
- Deltid Samlingar
- Studiepoeng:
- 30
- Varigheit:
- 2 semester (1 år)
- Studietype:
- Vidareutdanning (bachelornivå)
- Søk frå:
- 01.02.2026
Studiet har løpande opptak.
Studiet omfattar grammatiske strukturar og lydsystemet i det engelske språket og utvikling av eiga språkferdigheit, tekstkompetanse og produktivt ordforråd. Det blir lagt vekt på engelskundervisning for 1.–7. årssteg, kva som kjenneteiknar elevane i denne aldersgruppa og deira språkutvikling. Studentane vil få innsikt i ulike læringsaktivitetar og arbeidsmåtar.
Dersom du er lærar som er innvilga økonomisk støtte frå UDIR og ynskjer prioritert opptak på dette emnet, må du laste opp dokumentasjon om dette i søknadsweb. Legg ved e-post eller kopi av brev frå UDIR.
Har du spørsmål om dette kan du kontakte EVU-koordinator Ole Frank Bakken.
Her finn du meir informasjon om økonomisk støtte til vidareutdanning gjennom UDIR: https://www.udir.no/kvalitet-og-kompetanse/kompetanseutvikling/videreutdanning/
Meir informasjon om studiet
Studiet kvalifiserer for undervisning i engelsk på 1.–7. årssteg i barneskulen.
Tidspunkt for oppmøte og samlingar
Haust 2026:
- Samlingsveke 1: Veke 36 - tysdag 1. september til onsdag 2. september
- York ekskursjon: Veke 39
- Samlingsveke 2: Veke 45 - tysdag 3. november til onsdag 4. november
- Munnleg eksamen: Veke 50 - torsdag 10. desember (via Zoom)
Vår 2027:
- Samlingsveke 3: Veke 4 - tysdag 26. januar til onsdag 27. januar
- Samlingsveke 4: Veke 17 - tysdag 27. april til onsdag 28. april
- Munnleg eksamen: Torsdag 10. juni
Opptakskrav
Fullført lærarutdanning (grunnskulelærar, allmennlærar, førskulelærar, barnehagelærar, eller Praktisk-pedagogisk utdanning PPU).
Studieplan - Deltid
Engelsk 1 for 1.–7. trinn
Engelsk 1 for 1.–7. årssteg gir lærarar ei innføring i engelsk språk, fagdidaktikk, litteratur og kultur som kvalifiserer til undervisning i faget i barneskulen. Studiet omfattar kunnskap om grammatiske og fonologiske strukturar i det engelske språket, og utvikling av eiga språkferdigheit, tekst- og kulturkompetanse, og produktivt ordforråd. Det blir lagt vekt på engelskundervisning for 1.–7. årssteg, kva som kjenneteiknar elevane i denne aldersgruppa og deira språkutvikling. Studentane vil få innsikt i ulike læringsaktivitetar og arbeidsmåtar. Kunnskap om og trening i å lese og bruke litterære tekstar innan ulike sjangrar og til ulike formål, film og digitale ressursar står òg sentralt i studiet. I tillegg omfattar studiet kunnskap om kulturar i engelskspråklege land.
I samsvar med det nasjonale kvalifikasjonsrammeverket har studenten følgjande læringsutbytte etter fullført studium:
Studenten
- har kunnskap om engelsk språksystem når det gjeld grammatikk, ordforråd og uttale, og om skilnader og likskapar mellom norsk og engelsk språksystem
- har kunnskap om sjangrar og sjangerkrav på engelsk, skriftleg og munnleg
- har kunnskap om korleis barn lærer andrespråk/framandspråk og om korleis ein kan fremje slik læring
- har kunnskap om dei krav samfunnet stiller til undervisning i andrespråk/framandspråk
- har kunnskap om utvikling av dei grunnleggande ferdigheitene
- kjenner eit utval tekstar til både personleg vekst og undervisningsbruk
- kjenner nokre trekk ved kulturar og samfunn i engelsktalande land
Studenten kan
- bruke engelsk sikkert og funksjonelt skriftleg og munnleg, og tilpasse språket til målgruppa i ulike situasjonar
- bruke normer for akademisk tekstproduksjon
- lese, forstå og ta i bruk engelske tekstar for born og unge
- bruke kunnskapen sin om engelsk språk, litteratur, kultur, og didaktikk til å legge til rette for god språklæring og læring om andre kulturar
Studenten kan
- formidle relevant fagstoff og kommunisere på engelsk på ein måte som er tilpassa målgruppa
- reflektere over eiga læring og praksis i forhold til etiske grunnverdiar og skulens ansvar for den personlege veksten hjå barn og unge
- arbeide sjølvstendig og saman med andre for å løyse identifiserte problem knytte til elevar si læring og utvikling i engelskfaget
- bruke kjelder etisk og kritisk
Studiet er sett saman av to emne på 15 studiepoeng kvar, begge med avsluttande eksamen. Emne 1A er lagt til haustsemesteret, og emne 1B er lagt til vårsemesteret. Sjå studemodell for meir informasjon om studieløpet.
Emnet er samlingsbasert, med fire samlingar fordelt over to semester, kvar på to eller tre dagar. I tillegg kjem nettleksjonar til strøyming, og ei vekessamling ved Det norske studiesenteret i York. Undervisningssamlingar er obligatoriske, men studentar som ikkje er i stand til å delta på samlinga i York vil få denne erstatta med eit kompensatorisk arbeid basert på tema som vert underviste i York. Nettundervisninga vert som hovudregel gitt i Canvas, men også i form av nokre videomøte. For å gå opp til eksamen i eit emne må studentane møte til og delta aktivt på minimum 50 % av undervisninga, og alle arbeidskrav knytt til emnet vere godkjende. Nokre av arbeidskrava fordrar at studenten anten jobbar i grunnskulen eller kan få tilgang til skuleklasser i relevant aldersgruppe for å prøve ut undervisningsopplegg.
| Emne | 2026 Haust | 2027 Vår |
|---|---|---|
| 15 | ||
| 15 | ||
| Sum (30 total) | 15 | 15 |
Studenten må ha tilgang til datamaskin, oppdatert programvare og utstyr som webkamera og hovudtelefon med god mikrofon, eventuelt frittståande bordmikrofon med USB-plugg.
Då opptak på studiet føreset fullført lærarutdanning, er det ikkje krav til praksis i studiet.
Det vert ei vekesamling ved Det norske studiesenteret i York (sjå merknad over).