Fordjupingsstudium
Rettleiings- og mentorutdanning 1
Studiet er retta mot barnehagelærarar, grunnskulelærarar og lærarar i vidaregåande opplæring, og gir kunnskap om eit breitt spekter av teoriar og metodar for rettleiing som verkty for læring og kompetanseutvikling.
- Start:
- Haust
- Omfang:
- Deltid Samlingar
- Studiepoeng:
- 15
- Varigheit:
- 2 semester (1 år)
- Studietype:
- Fordjupingsstudium
- Søk frå:
- 01.02.2024 - 21.06.2024
Studiet er retta mot barnehagelærarar, grunnskulelærarar og lærarar i vidaregåande opplæring, og gir kunnskap om eit breitt spekter av teoriar og metodar for rettleiing som verkty for læring og kompetanseutvikling.
Sentrale tema er kommunikasjon, relasjon og samspel, etiske dilemma og makttilhøve i rettleiing. Det blir lagt vekt på korleis rettleiing, både individuelt og i gruppe, kan styrke læring og utvikling for studentar i praksis, nyutdanna og kollegaer.
Opptakskrav
Fullført barnehagelærar- eller lærarutdanning, og vere i arbeid som barnehagelærar, grunnskulelærar eller lærar i vidaregåande opplæring.
Undervisningsmåtar og vurderingsordningar
Undervisninga er samlingsbasert med nettstøtte. Studiet har varierte arbeidsformer, som førelesingar, rettleiingsøvingar, obligatorisk studentframlegg og plenumsdiskusjonar. Mellom samlingane skal det gjennomførast rettleiingsarbeid på arbeidsplassen og i lokale nettverksgrupper.
Les om vurderingsordningar og eksamen i emneplanen.
Aktuelle yrke og vidare studium
Studiet gir kompetanse i rettleiing av studentar i praksis og kollegaer i barnehage og skule.
Tidspunkt for oppmøte og samlingar
Samlingane går over to dagar, dag 1 frå 13.15 til 18.00 og dag 2 frå 9.15 til 15.00
Samlingsdatoar:
Haust 2024
Veke 38: 18. – 19. september
Veke 45: 6. – 7. november
Vår 2025
Veke 2: 8. – 9. januar
Veke 11: 12. – 13. mars
Vel møtt!
Studieplan
Rettleiings- og mentorutdanning 1 - vidareutdanning
Målgruppa for studiet er barnehagelærarar og lærarar som skal vere praksislærarar i barnehage, skule og vidaregåande opplæring, og/eller rettleiarar/mentorar for nyutdanna kollegaer. Kvaliteten i grunnutdanningane si praksisopplæring skal styrkast mellom anna ved å gi alle praksislærarar tilbod om opplæring i rettleiing. Studiet rettar seg også inn mot rettleiing av kollegaer og barn/elevar. Studiet har ei brei tilnærming til rettleiingsfeltet og legg vekt på utvikling av både kunnskapar om, og ferdigheiter i, rettleiing. Sentralt i studiet er styrking og utvikling av kommunikative ferdigheiter, relasjonskompetanse og refleksjon, og kritisk analyse av eigen praksis som rettleiar. Innsikt i etiske dilemma og maktforhold i rettleiingssituasjonar er også sentralt i studiet. Vidare vil det verte lagt vekt på yrkesrolla i barnehage og skule, profesjonsidentitet og deltaking i profesjonelle læringsfellesskap. Studiet gir innsikt i nasjonal og internasjonal forsking om rettleiing.
I Nasjonale Retningsliner for grunnskulelærarutdanninga ( KD, 2017) er det krav om at praksislærarar skal ha gjennomført vidareutdanning i rettleiing på minimum 15 studiepoeng. Dette kravet vil også kunne gjelde praksislærarar i vidaregåande opplæring. I følgje Retningsliner for barnehagelærarutdanning (KD, 2018) er det krav om 30 stp rettleiing for å vere praksislærar i barnehagen. I 2017 vedtok Stortinget nasjonale rammer for rettleiing av nyutdanna. Alle nyutdanna lærarar og barnehagelærarar skal få tilbod om rettleiing, og utdanning av rettleiarar er eit av tiltaka for å sikre god rettleiing (KD 2018). Rettleiingsutdanninga er eit bidrag til å støtte desse tiltaka.
I tråd med det nasjonale kvalifikasjonsrammeverket har studenten følgjande læringsutbytte etter fullført studieprogram
Studenten
- har kunnskap om varierte teoretiske tilnærmingar til rettleiingsfeltet
- har innsikt i etiske utfordringar og maktforhold i rettleiing og i læraryrka
- har kunnskap om korleis rettleiing kan nyttast som ein viktig del i utvikling av lærarrolla og i kompetanseutviklingsarbeid i skule og barnehage
- har innsikt i korleis ein kan inkludere studentar og nyutdanna i eit kritisk, reflekterande fellesskap i barnehage og skule
Studenten
- kan planleggje, grunngje, gjennomføre og evaluere rettleiingsarbeid både sjølvstendig og i samarbeid med andre
- kan stimulere læring og utvikling i relasjonar og meistre kommunikasjon på ulike nivå
- kan analysere og reflektere kritisk over eigen og andre sin praksis som rettleiar
- meistrar å utøve etiske vurderingar i samanheng med rettleiing
Studenten:
- kan kritisk vurdere ulike rettleiingsteoretiske tilnærmingar i skule og barnehage
- har innsikt i relevante etiske problemstillingar knytte til rettleiingsfeltet
- kan drøfte teoriar og erfaringar med andre og gjennom dette medverke til nytenking og utvikling av god praksis
Studiet er samlingsbasert med fire todagars samlingar. Det er obligatorisk frammøte til alle samlingar (Minimum 75% oppmøte). Samlingane er lagt til Høgskulen i Volda.
Sjå emneplanen for informasjon om samlingar
| Emne | 2024 Haust | 2025 Vår |
|---|---|---|
| 7.5 | 7.5 | |
| Sum (15 total) | 7.5 | 7.5 |
Studentane må ha tilgang til programvare som gjer at dei kan delta i rettleiing på nettet gjennom Zoom eller Teams.
Studentane skal rettleie medstudentar i nettverksgrupper utanom samlingane og studentar og/eller kollegaer på arbeidsplassen.