Med krav om tilpassa opplæring i eit inkluderande fellesskap og digitale ferdigheiter som ei grunnleggjande ferdigheit, aukar behovet for tilrettelegging i bruk av digitale ressursar i ein stadig meir digitalisert kvardag. Bruk av digitale ressursar gir nye moglegheiter for variasjon, differensiering, individuell tilpassing, nivåinndeling og adaptiv læring i eit læringsfellesskap. Emnet tek utgangspunkt i tilpassa opplæring med digitale ressursar for alle elevar i ordinær undervisning, med særlig fokus på arbeid med grunnleggjande ferdigheiter.

Tilpassingsmoglegheitene aukar i takt med tilgangen på teknologi, digitale verktøy og ressursar. Tilrettelegging for elevane sitt læringsutbytte i eit digitalt samfunn krev ferdigheiter og kunnskapar for best mogleg utbytte av dei digitale ressursane. Dette omfattar blant anna utprøving og vurdering av digitale ressursar, samt kunnskapar om trygg og variert bruk av ressursane. I tillegg krev det kunnskapar om digital dømmekraft og om barn og unge sin mediekultur. Utprøving og bruksområde for ulike digitale læringsressursar vil difor stå sentralt. Kopling mellom ressurs, læringsmål og faginnhald, samt barn og unge sin mediebruk og utøving av digital dømmekraft vert også vektlagt.

Emnet er utvikla for å gi eit tilbod til lærarar og pedagogar i grunnskulen som ønsker å utvikle sin profesjonsfaglege digitale kompetanse med tanke på tilpassa opplæring.