Disputas: Andreas Tjomsland

Tjomsland, som er stipendiat ved Høgskulen i Volda, har følgt ph.d.-programmet i humaniora og pedagogikk med spesialisering i religion, etikk, historie og samfunn ved Universitetet i Agder.

Tjomsland forskar primært på nordvestlandsk indremisjon på 1900-talet. I arbeidet med avhandlinga har han kartlagt bedehusa i Møre og Romsdal og gamle Sogn og Fjordane. Data er samordna etter ein nordisk standard Tjomsland har vore med på å utvikle, og kan finnast her.

Om avhandlinga

Avhandlinga skildrar og analyserer strategiar brukt av indremisjonen for å konkurrere på den «religiøse marknaden» i fylka Møre og Romsdal og Sogn og Fjordane mellom 1920 og 1970. Avhandlinga kombinerer ei kulturell tilnærming til analysen av strategisk planlegging med bruk av «Rational Choice»-teori for å analysere religiøse marknadsdynamikkar. Avhandlinga undersøkjer utviklinga og vala til indremisjonsforeiningane, hovudsakleg på regionalt nivå. Kjeldematerialet er i hovudsak regionale indremisjonsblad. Gåverekneskap og ei geografisk og kronologisk registrering av bedehus gjev empirisk grunnlag for å beskrive utviklinga kvantitativt.

Eit sentralt tema er «marknadseffekten» av ulike endetidsteologiar, ulike gradar av lojalitet til Den norske kyrkja, ulike tilnærmingar til rekruttering, og ulike nivå av teologisk striktheit. Avhandlinga viser eit skifte frå ein veksande rørsle definert av radikale vekkingar på 1920- og 1930-talet, til ei minkande rørsle, kjend for hyggelege, inntektsbringande basarar rundt 1970. Denne endringa skjedde i større grad i meir kyrkjelojale variantar av indremisjonen enn i dei meir kyrkjekritiske, og gjev eit norsk døme på verknaden av «strong religion».

Her kan du lese heile avhandlinga.

Program

Kl. 10.00: prøveforelesing. Tema: Indremisjonsbevegelsen på Nord-Vestlandet - sett i et skandinavisk perspektiv.

Kl. 12.00: disputas.

Disputasen finn stad ved Universitetet i Agder, rom B1 001 (campus Kristiansand).

Disputasen er open for alle. Meld deg på via denne Zoom-lenka.

Du loggar deg på tidlegast 10 minutt før oppgitt tid. Etter dette kan du når som helst forlate og kome inn att i disputasen.