Skikkavurdering

Skikkavurdering skal sikre at personar innanfor enkelte yrke er skikka til det arbeidet dei er utdanna til. Det betyr at dei i tillegg til den faglege kunnskapen, også skal vere personleg eigna til å utføre jobben. Jamfør Universitets- og høyskoleloven § 4-10 og Forskrift om skikkethetsvurdering i høyere utdanning.

Kva meinast med skikkavurdering?

Skikkavurdering er ei heilskapsvurdering av studenten sine faglege og personlege føresetnader for å kunne fungere som lærar, helse- eller sosialpersonell. Skikkavurdering gjeld studentar som tek utdanningar der dei skal ha nære relasjonar til andre menneske.

Kven er ikkje skikka?

Ein student som utgjer ei mogleg fare for barnehageborn, elevar, pasientar, klientar og brukerar sitt liv, fysiske og psykiske helse, rettar og sikkerheit, er ikkje skikka for yrket.

Kvifor skikkavurdering?

For å sikre at berre studentar som oppfyller rammeplanen sine krav får vitnemål.

Laupande skikkavurdering

Vitnemål for fullført utdanning føreset at studenten er vurdert som skikka for yrket. Laupande skikkavurdering føregår gjennom heile studiet. Som student får du rettleiing og oppfølging. Du har også sjølv ansvar for å søkje rettleiing. Faglærar, øvingslærar, studierettleiar, praksisleiar og praksisrettleiar for dei enkelte utdanningane har eit særleg rettleiingsansvar.

Saksgangen ved tvilsmelding

Kven kan levere grunngjeven tvilsmelding?

Er det tvil om ein student er skikka, skal underteikna tvilsmelding leverast til institusjonsansvarleg for skikkavurdering. Alle som er i kontakt med studenten, fagleg tilsette, studentar og administrativt tilsette, kan levere tvilsmelding. Den som leverer tvilsmelding er ikkje part i saka, og har soleis ikkje krav på tilbakemelding.

Særskilt skikkavurdering

Ei slik vurdering skal setjast i verk ved grunngjeven tvil, på bakgrunn av ei levert tvilsmelding. Forvaltinglova sine reglar om saksbehandling vert teken i bruk ved særskilt skikkavurdering.

Institusjonsansvarleg tek ei skikkavurdering

Institusjonsansvarleg er tilsett ved institusjonen og har ansvar for behandling av tvilsmeldingar før eventuell behandling i skikkanemnda. Den institusjonsansvarlege kallar då studenten inn til ei vurderingssamtale, der saka skal verte så godt utgreidd som mogleg. Samstundes kan studenten få tilbod om utvida rettleiing. Dersom dette skjer i forkant av praksis, må studenten utsetje praksis til etter behandling. Den utvida rettleiinga vert gitt av ein eller to personar som institusjonsansvarleg i samarbeid med instituttet peikar ut. Dersom ein ser at rettleiinga ikkje har noko effekt, vert saka sendt vidare til Skikkanemnda.

Skikkanemnda

Ved behandling i Skikkanemnda, vert saka også belyst, og ein innhentar meir informasjon dersom det er nødvendig. Studenten kan møte der og legge fram sine synspunkt for nemnda. Skikkanemnda lagar ei innstilling som går vidare til Klagenemnda. Dette er veldig alvorlege saker, og difor er det viktig at sakene også vert behandla grundig.

Klagenemnda

Klagenemnda avgjer om studenten er skikka til yrket eller ikkje. Jamfør §11 og §12 i Forskrift om skikkethetsvurdering i høyere utdanning.

Regelverk

Universitets- og høyskoleloven § 4-10 og Forskrift om skikkethetsvurdering i høyere utdanning. Nærare vurderingskriterier for skikkavurdering innanfor lærarutdanningane og helse- og sosialfagutdanningane finn du i forskrifta §3 og §4.  

Finn du ikkje informasjonen du treng?

Kontakt Studentsørvis:
 70 07 50 18 | studentsorvis@hivolda.no 
eller kom innom i opningstida: 
- måndag kl. 9.30 - 15.45 
- tysdag - fredag kl. 9.00 - 15.45

Du finn oss i 1. etasje i Berte Kanutte-huset