Opne foredrag med professor J. Peter Burgess

I veke 42 kjem J. Peter Burgess, professor ved École normale supérieure, til Høgskulen i Volda (HVO). Han er filosof, har jobba særskilt med tryggleikstenking og har vore tilsett og knytt til fleire norske (mellom anna PRIO – Institutt for fredsforskning) og internasjonale institusjonar. Burgess har tidlegare også vore knytt til HVO, og han har skrive boka Ivar Aasen’s Logic of Nation. Toward a Philosophy of Culture.

Burgess kjem til Volda for å delta på ei todagars forskingssamling med HVO-forskingsgruppa Religion og livssyn om temaet humanistisk beredskap. Under opphaldet vil han også halde to foredrag på høgskulen onsdag 15. oktober. Begge foredraga finn stad på SAA 225 i Siver Aarflot-huset og er opne for alle som ønskjer å kome og høyre på:

• Kl. 10–11: «Spirituell beredskap» med utgangspunkt i austleg tenking og advaita. Innlegget er i regi av HVO-forskingsgruppene Kulturmøte og Religion og livssyn, men er ope for alle interesserte.
• Kl. 13–14:  Kunstig intelligens i forsking. Burgess vil drøfte dei etiske sidene ved bruk av kunstig intelligens som angår oss som menneske. Kva gjer det med oss som menneske og som forskarar, som handlande og tenkjande? Kva har det å seie for kreativiteten vår? Innlegget er i regi av HVOs ph.d.-program Helse- og sosialfag: Profesjonsutøving – vilkår og utvikling og Utdanning, språk og kultur. Innlegget inngår i Avhandlingsforum (forumet for stipendiatar som er knytte til HVO), men er ope for alle interesserte.

Velkommen!