Innspelsmøte om nytt demokratisenter gav stor inspirasjon
Tysdag kveld strøymde engasjerte innbyggjarar til Hans Strøm-huset for å gi innspel til eit demokratisenter som er på trappene i Volda.
Høgskulen i Volda (HVO) inviterte innbyggjarar, frivillige lag og organisasjonar til å kome med innspel til eit nytt demokratisenter i Volda. Temaet viste seg å engasjere mange.
Hausten 2025 fekk Høgskulen i Volda (HVO), i samarbeid med Norsk innovasjonssenter (NIAS), tildelt midlar frå Sparebankstiftinga Søre Sunnmøre. Midlane skal brukast til å utforske moglegheitene for å etablere eit regionalt demokratisenter.
Tysdag kveld inviterte dei til eit ope innspelsmøte for å samle idear til det nye senteret. Både innbyggjarar, frivillige lag og organisasjonar deltok, og eit engasjert publikum kom med idear og inspirasjon til kva eit slikt senter kan innehalde.
Tilstanden til demokratiet i dag
HVO-professor og prosjektleiar Bjarte Folkestad opna møtet med å presentere demokratiet si stilling i dag. Han trekte fram viktigheita av å dyrke demokrati i ei tid der store delar av verda bevegar seg i retning av autoritære styreformer.
Folkestad viste også til fleire spennande moglegheiter med eit demokratisenter i Volda – til dømes at barn kan lære meir om lokaldemokrati ved å prøve seg som lokalpolitikar for ein dag.
Frivilligheita si rolle i framtida
Rebecca Riise Bjerknes, som er leiar i frivilligsentralen i Ørsta, heldt eit innlegg der ho mellom anna trekte fram viktigheita av god koordinering og samarbeid mellom kommune og frivilligheita.
Ho poengterte at det er viktig å prioritere samarbeid for å vere godt rusta i møte med behova i framtida.
– Velferdsstaten kjem til å trenge frivillige i dei komande åra for å dekkje ulike behov. Då er det viktig å prioritere koordinering av frivillige for å leggje til rette for utviklinga, sa Riise Bjerknes.
Idémyldring i grupper
Den viktigaste delen av møtet gjekk ut på gruppearbeid og erfaringsutveksling. Alle borda fekk utdelt ark og Post-it lappar, der deltakarane først skreiv ned eigne tankar, før dei diskuterte i grupper og i plenum.
Lappane vart samla inn på slutten av møtet og skal nyttast vidare i planleggingsprosessen til demokratisenteret.
Laura Ledig, Rebecca Rist og Emily MacPherson frå Studentparlamentet deltok for å fremje studentane sine perspektiv på demokrati. Dei løfta uro rundt polarisering i sosiale medium og det at unge blir trekte i ulike retningar der verda blir svart-kvit.
Studentrepresentantane formidla også fordelane med å starte opplæring i demokrati og diskusjon frå tidleg alder for å førebygge isolasjon og eit usunt debattklima.
– Ungdomen er framtida, sa MacPherson, som poengterte at det er viktig å inkludere unge i dei demokratiske prosessane.
