Nasjonal festkonsert ved Symfoniorkesteret 17. mai

Symfoniorkesteret ved Høgskulen i Volda (HVO) ynskjer vel møtt til festkonsert nasjonaldagen i Volda kyrkje. Med årets festkonsert byr orkesteret på både alvor og skjemt med sprudlande musikk frå norske komponistar og frå langt utanfor Noregs grenser. Franskmannen Édouard Lalo sin Rapsodie norvégienne byggjer på norske folketonar, mellom anna Den bakvendte visa. Hundreårs-jubilanten og kristiansundar Edvard Fliflet Bræin er representert med to verk: den melodiøse og folkekjære Ut mot havet, og den skøyeraktige Liten ouverture komponert over folketonen Tordivelen og flua. Elles på programmet står verk av Kjell Flem, Geirr Tveitt og Edvard Grieg.

Med på konserten er to spennande solistar. Høgskulelektor Hildegunn Hovde ved HVO er utdanna songar og pedagog frå Barratt Due Musikkinstitutt, og ho har mellom anna ein mastergrad i utøving frå Norges Musikkhøgskole. Hildegunn har ei rekke plateinnspelingar bak seg frå både inn- og utland, frå vise og folkemusikk til klassisk og elektronika. Til dagleg underviser ho i musikk ved HVO og er elles utøvande som songar og kordirigent. På konserten vil ho synge i samband med to av programpostane.

Åsmund Arnesen Farstad er solist i Geirr Tveitt sin konsert nr. 2 for hardingfele, Tri fjordar. Åsmund er frå Volda og er utøvande på fele og hardingfele, og for tida student ved Norges Musikkhøgskole.  I tillegg til å vere tradisjonell solo-spelemann har han vore solist i større oppsettingar og elles spelt i ei rekke grupper og prosjekt, som til dømes folkrock-trioen Kjeltring, Fargespel og gamaldansgruppa Farstad & Farstad. Han har vunne ei rekke prisar og stipend innan folkemusikk og klassisk musikk og har også høge plasseringar på regionale og nasjonale kappleikar.

Dirigent for konserten er førstelektor Elizabeth Oltedal ved HVO. Tradisjon tru får barn, skuleelevar og studentar gratis inngang til denne konserten. Velkomen!