Lunsjarrangement: Blått svev – poesikonsert
Geir Hjorthol er professor emeritus i nordisk litteratur, men også utøvande musikar. Instrumenta hans er trompet, perkusjon og elektronikk. I lunsjarrangementet på biblioteket torsdag 26. februar er det denne sida av verksemda hans du får oppleve, i form av ein konsert i samtale med dikt av Jon Fosse.
Som litteraturforskar har Geir i seinare år vore oppteken av forholdet mellom litteratur og musikk, særleg hos Dag Solstad, Lars Amund Vaage og Jon Fosse. Solstad har Geir skrive doktoravhandling om. Lars Amund Vaage har han samarbeidd med gjennom fleire år, både om konsertar og ei plateutgjeving ("Den raude staden", 2018). I Skriftkultur nr. 5/2023 skriv han om musikaliteten i Fosses "Septologien".
Jon Fosse er også lyrikar. I alt han har skrive, uavhengig av sjanger, ligg det ein poetisk kvalitet som mange lesarar også opplever som musikalsk. Men kva vil det seie? Til denne konserten har Geir valt seg ut nokre dikt av Fosse som utgangspunkt for ei improvisatorisk utforsking av forholdet mellom litteratur og musikk.
Det blir servering av kaffi og te – ta gjerne med lunsjen din.
Alle er velkomne!