Boklansering: «Gudstrua, samfunnet og politikken» – om regional religiøs kultur på 1800-talet
Gudstrua, samfunnet og politikken er ei samling med vitskaplege granskingar om religiøs kultur på Nordvestlandet gjennom «det lange 1800-talet» (dvs. perioden frå den franske revolusjon til fyrste verdskrig). Boka presenterer ny regional forsking på ein omskifteleg og innhaldsrik historisk periode. Gjennom i alt ni kapittel finst stoff om mellom anna kvinner i Hauge-rørsla, politiske prestar, folkehøgskular, bedehus, emissærar, nordvestlandske «profetinner», skulehaldarar og tidlege ynglingeforeiningar.
Frå venstre Mathias Nygaard, Marie Nedregotten Sørbø, Jan Inge Sørbø, Per Halse, Harald Johannes Krøvel og Knut-Willy Sæther. Ikkje til stades: Andreas Tjomsland, Jan Ove Ulstein og Morten Øveraas.
Den ferske antologien er resultat av eit verdifullt samarbeid mellom museumssektoren (Romsdalsmuseet) og Høgskulen i Volda (Historisk institutt og Institutt for religion og livssyn). Boka er skriven av åtte fagfolk, og dei fleste av forfattarane vil vere til stades på lanseringa i biblioteket på Høgskulen i Volda tysdag 21. april. Der vil fyrst redaksjonen kort presentere prosjektet og produktet, og så skal to av forfattarane gje nærare innsyn i kapitla som framhevar kvinnelege forkynnarar på 1800-talet.
Som vanleg vert det mot slutten gjeve høve til spørsmål og samtale.
Det blir servering av kaffi og te – ta gjerne med lunsjen din.
Velkomen!