Gurskenkonferansen 2023

Gurskenkonferansen blir arrangert 15. november 2023 på Thon Hotel Fosnavåg kl. 16.30–19.30. Det er gratis å vere med, og alle interesserte kan melde seg på innan 13. november ved å kontakte Bjørn Gunnar Tafjord, seniorrådgjevar for FoU og ekstern aktivitet ved Avdeling for samfunnsfag og historie.

Vil få fram synergiane i regionen

– HVO er ein viktig samfunnsaktør i sunnmørsregionen, og høgskulen skal vere synleg og relevant overfor det arbeidslivet som finst her – og ikkje minst må vi vise studentane våre kva som finst av arbeidsliv i regionen, understrekar Bjørn Gunnar Tafjord.

Han vil oppmode både studentar og tilsette om å nytte seg av denne typen møtepunkt med næringslivet og samfunnsaktørane i regionen, og han tipsar om at Gurskenkonferansen er lagd utanfor arbeidstid, slik at den praktiske terskelen for deltaking skal vere lågare.

– Sjølv om konferansen har eit maritimt fokus, femnar han eigentleg vidare: Mange er nok ikkje klar over kor mange ulike typar stillingar som finst i store, private bedrifter på Sunnmøre. Studentane trur kanskje at ein må vere ingeniør, økonom eller sveisar for å jobbe i mange av sektorane i regionen vår, men det er svært stor breidde i relevante stillingar i næringslivet her, så det er viktig å vere nysgjerrig på kva som finst, og det gjeld også for undervisninga og forskinga ved HVO, utdjupar Tafjord.

Program

• 16.30: Opning med kunstnarisk innslag
• Innlegg og debattar
  • Samtale med Sylvi Listhaug og Linda Hofstad Helleland.
  • Debatt: Sylvi, Linda og Per Sævik saman med lokale politikarar. Debattleiar er Jan Åge Fjørtoft.
• Næringsteft
• «Skaparglede»
  • med Njål Sævik, Per Sævik, Kjersti Kleven og Tore Ulstein
• Prisutdeling
• Avslutning med kunstnarisk innslag
  • song og musikk: Laila F. Sandanger og Bjørn Holum
• 19.30: Slutt

Sjå fleire detaljar om konferansen og programmet her (PDF-fil).