Såkornmidlar
Høgskulen i Volda har sidan 2016 delt ut såkornmidlar. Målet med såkornmidlane er at dei skal bidra til auka forskingsaktivitet ved å stimulere og hjelpe til å sette i gang forskings- og utviklingsprosjekt. Dette kan ta form av støtte til å utarbeide konkrete prosjektsøknader retta mot regionale, nasjonale og internasjonale finansieringskjelder, eller støtte til å starte og/eller delta i nasjonale og internasjonale forskingsgrupper og -nettverk, som førebuing til å delta i og søke om finansiering til forskingsprosjekt. Det er også høve til å søkje om støtte til å forbetre tidlegare innsendte søknader om ekstern finansiering.
Søknader om støtte til å drive fram og utvikle søknader til regionale, nasjonale eller internasjonale (EU) forskingsfond og andre finansieringskjelder vert prioriterte.
Det vil vere ein fordel om søkjarane deltek i ei av høgskulens forskingsgrupper og/eller er aktive i eit forskingsmiljø. Forskingsgrupper og forskingsmiljø blir oppmoda til å søkje om såkornmidlar som gruppe. Når det gjeld frikjøp til individuell forskingstid, så viser vi til ordninga med FoU-stipend. Det er ønskeleg at søknadene er av ein viss storleik, helst på summar over kr 75 000,-. Forskingsutvalet oppmodar søkjarar til tverrfagleg samarbeid, samarbeid med andre forskingsinstitusjonar og til samforfattarskap med forskarar utanfor HVO.
Krav til søknadene:
Prosjektet skal ta sikte mot konkrete resultat i form av ein prosjektsøknad til ekstern finansieringskjelde eller etablering av eit konkret forskingssamarbeid. For sistnemnte må målet vere å utarbeide søknad om ekstern finansiering på sikt og helst gi resultat i form av sampublisering.
Søknaden skal spesifisere mål og tiltak, og den må innehalde budsjett for aktivitetane det vert søkt om støtte til.
Ein einskild person skal vere prosjektansvarleg.
Det må argumenterast for korleis fagfeltet til prosjektet eller forskingsgruppa passar med dei strategiske måla til avdelinga og HVO.
Det skal sendast inn ein kortfatta rapport om bruken av midlane og oppnådde resultat til Forskingssjef. Rapporten vil verte lagt fram i Forskingsmeldinga og i Forskingsutvalet.
Søknadene kan vere på inntil 4 sider og må i tillegg innehalde CV til prosjektansvarleg.
Søknadsfrist: 10. mars 2020.
Midlane vert delt ut av Forskingsutvalet i møtet 24. mars 2020.