Barnevernspedagogutdanning, 3 år
Barnevernspedagogutdanninga er ei sosialarbeidarutdanning retta mot barn og unge.Hovudoppgåva er å sikre og betre levevilkåra for barn og unge. Dette gjeld særskilt for dei som har sosiale og/eller psykiske problem,eller som står i fare for å få det.
Innhald
Studiet er organisert kring ein kjerne av fem fagområde, som er disiplininnføringar, tematiseringar og dels yrkesmetodisk orientert. Undervisninga vekslar mellom storgruppeundervisning (saman med sosionomstudentane), klasseundervisning og seminar. Ein del av den relasjonsorienterte og yrkesmetodiske undervisninga er obligatorisk.Dette gjeld for drama- og aktivitetsfagundervisning, og samtaleøving og rådgiving med videobruk i studentøvingar. Prosjektpraksis i 2.studieår og klientretta praksis i 3. studieår er også obligatoriske element i studiet. I aktivitetsfaget kan studentane velje mellom 4 fordjupingsområde: Barn og kreativitet, video, friluftsliv og drama.
Dei fem fagområda i barnevernspedagogutdanninga er:
· Samfunnsvitskaplege emne 12 vekttal
· Juridiske emne 5 vekttal
· Psykologiske og helsefaglege emne 11 vekttal
· Pedagogiske emne 7 vekttal
· Sosialpedagogisk arbeid med barn og unge 25 vekttal
Av dei 60 vekttalla i barnevernspedagogutdanninga vert 14 vekttal nytta til dugleikstrening og praksis, av desse 10 vekttal i samarbeid med brukarar/klientar. I 3. studieår skriv studentane ei fordjupingsoppgåve tilsvarande 4 vekttal.
Kompetanse og yrkesliv
Barnevernspedagogar arbeider i dag i kultur- og oppvekstsektor, med utekontakt og ungdomsklubbarbeid, i skule og skulefritidsordningar. Dei arbeider i barne-og ungdomsinstitusjonar, med behandling og omsorgsoppgåver. Dei er tilsette ved barnevernstenesta i kommunar med særleg oppfølging av barn som har vanskelege heimetilhøve, og dei går inn på nye arenaer der fokus er retta mot barn sin situasjon. Utdanninga tilsvarar 60 vekttal i ein cand.mag.-grad.
Sosionomutdanning, 3 år
Sosionomutdanninga kvalifiserer for arbeid med sosiale problem på ulike felt og med ulike målgrupper.Sosionomen skal gjennom utdanninga ha fått kunnskap om ulike arbeidsformer, og særskilt arbeidsformer der brukar er aktiv deltakar og mobiliserer eigne ressursar. Ein brukar kan vere einskildperson, gruppe eller organisasjon. Sosionomen skal ha særleg kunnskap om menneske i marginale posisjonar, deira vanskar og livsvilkår. Gjennom utdanninga skal ein få kompetanse til å synleggjere og fremme rettar og interesser som brukar har.
Innhald
Studiet er organisert kring ein kjerne av hovudområde, som er disiplininnføringar, tematiseringar og dels yrkesmetodisk orientert. Undervisninga vekslar mellom storgruppeundervisning (saman med barnevernspedagogstudentane), klasseundervisning og seminar. Ein del av den relasjonsorienterte og yrkesmetodiske undervisninga er obligatorisk. Det gjeld dramaundervisning i tillegg til samtaleøving og rådgiving med videobruk i studentøvingar. Prosjektpraksis i 2.studieår og klientretta praksis i 3. studieår er også obligatoriske element i studiet.
Dei fem fagområda i sosionomutdanninga er:
· Samfunnsvitskaplege emne 18 vekttal
· Psykologiske emne 6 vekttal
· Juridiske emne 6 vekttal
· Sosialt arbeid -grunnelement 10 vekttal
· Sosialt arbeid -arbeidsmåtar 20 vekttal
Av dei 60 vekttalla i sosionokutdanninga vert 14 vekttal nytta til dugleikstrening og praksis, av desse 10 vekttal i samarbeid med brukarar/klientar. I 3. studieår skriv studentane ei fordjupingsoppgåve tilsvarande 4 vekttal.
Kompetanse og yrkesliv
Sosionomen arbeider i dag i sosial – og helsesektoren i kommunane, i fylkeskommunale institusjonar og behandlingstilbod, i kriminalomsorg og i humanitære organisasjonar. Vi finn såleis sosionomar mellom anna ved sosialkontor, i tilbod for funksjonshemma, i skuleverket, ved familierådgivingskontor, i fengsel og kriminalomsorg i fridom, i eldre- og rusmiddelomsorg. Utdanninga tilsvarar 60 vekttal i ein cand. mag.-grad.
|Tilbake til studietilbod
|Til HVO si heimeside
For WWW: -pab2001