Ordet heimeside oppstod ganske sikkert som ein teknisk allegori. No har ordet kanskje også fått andre tydingar? Og det kan nok hende at ordet har framtida attom seg.

Ei heimeside den sentrale sida på ein vevtenar. Heimesida er overordna dei andre sidene i eit hierarki av hyperlenka dokument, og sidan hierarkiet er modellen, er det alltid ei slik hovudside på toppen i filstrukturen.

              H
         /     |     \
     S1 -- S2 -- S3

Heimesida er med andre ord ein form for "basecamp", startpunkt og orienteringspunkt for ein nettstad. Dei fleste vevtenarar viser filer med namn home.html automatisk når vevstaden blir opna, alternativt index.html eller default.html.

Orienteringspunkt
Den andre tydinga, slik eg har lagt merke til at omgrepet blir brukt av mange, ser ut til å referere meir til ein heil vevstad. Det kan hende det botnar i vitlaus bruk av ordet ettersom dei aller fleste vevstader har langt meir enn ei side? Kanskje nokre også tenkjer på heimeside som ei personleg vevside? Likevel kan ein også sjå vevstaden som ein "heim" i høve til resten av verdsveven, eller til ein del av han. Slik kan ei "heimeside", ein vevstad, bli eit godt orienteringspunkt for ein større struktur av vevstader som er hyperlenka saman. I den samanhengen er det kanskje interessant at fenomenet vevringar som regel ikkje har noko hierarkisk overordna heimeside, men er sett saman av mange likestilte heimesider.

"Heime hos verten"
Opphavet til "home page" er eg ganske sikker på var behovet for ein form for teknisk allergori; ei side som er "heime" hos "verten" (host) der ho blir tent av ein "tenar" (server), osv. Eg trur omgrepet har oppstått fordi ein hadde behov for konvensjonar der ein raskt kunne peike ut kva for eit dokument som var hovuddokumentet i ein haug med html-dokument. Slik er det framleis, bortsett frå at INDEX.HTML vann. Heimesidene no til dags heiter nesten alltid INDEX. Kanskje fordi heimesida svært ofte nettopp IKKJE er startpunktet i ei samling med hypertekstdokument. På internett søkjer ein gjerne etter noko, og får eit treff på ei side som berre nesten... Då er indeksen god å ty til.

Når dokumentasjonen på eit tidleg tidspunkt peiker på at ein filstruktur i HTML må ha ei hovudside, så er det nettopp fordi datateknikarar i sterk grad er bundne til hierarkiske strukturar. Hierarkiet går igjen i alle filsystem (som eg veit om i alle fall), i HTML-språket i seg sjølv, og i programmeringsspråka. I forhold til historiefunksjonen, er heimesida startsida. Skal det gje noka riktig god meining, må lesaren begynne med "riktig" side. 

Når oppstod omgrepet heimeside? 
Eg har leitt, og fann ut at det sannsynlegvis måtte ha vore omkring 1992, utan å finne noko direkte om dette. På Internett ser vi no at inngangen til ein nettstad sjeldnare er hovudsida enn ei anna side i systemet. Lesarane les på kryss og tvers. Informasjon er i seg sjølv ikkje nødvendigvis hierarkisk. Ei bok kan vere hierarkisk oppbygd med kapittel, underkapittel og avsnitt, men ho må ikkje lesast frå perm til perm. Derfor synest eg det er eit poeng at home.html ikkje lenger ser ut til å vere rådande, men INDEX.HTML. Indeksen i ei bok blir brukt når ein vil finne informasjon om eit bestemt emne som ikkje går fram av "boks"-strukturen elles. Eg trur at omgrepet "heimeside" syng på siste verset og at det vil forsvinne.

Av Hallvard Østrem

Hallvard Østrem er tilsett ved Nynorsk Pressekontor 
Lagt ut på nettet 26.2. 2001