Informasjon om festivalen:
knvestad@frisurf.no,
tlf.: 73527684 (svarar) og 72492200 (Agdenes kommune) 

Jordbæroperaen Jordbær-Liv er hovudattraksjonen på Kibneb-festivalen i Lensvik i Agdenes. Elles byr festivalen på alt frå folkemusikk til Mozart og Beatles. I år er det fjerde gongen denne spesielle "dugnaden" blir arrangert. Det skjer 13.-15. juli med utgangspunkt i garden Kibneb, midt i det trøndske jordbærriket. 

Komponisten og musikaren Knut Anders Vestad (fødd 1969) er mannen bak festivalen. 

- Da eg starta med Kibneb-festivalen for fire år sia var målet å halde festivalen hemmeleg og fri for offentleg støtte. Det har vorte noko heilt anna, fortel initiativtakaren. 

Starta som hemmeleg festival
Medan det dei fyrste åra berre var venner og kjende som gjekk saman ei helg for å ha fest(ival) for seg sjølv i Lensvik i Agdenes kommune, har den "hemmelege" festivalen no fått støtte og er svært så offentleg. I år er budsjettet på 400 000 kroner, med 140 000 kroner i offentleg støtte. Det blir kyrkjekonsert, barneførestelling og sikkert noko buskspell av ymse slag også på festivalen. 

Knut Anders Vestad har skrive musikken til jordbæroperaen, som mellom andre Anne-Mari Edvardsen og Erik Jacobsen syng i. Det blir to operaførestellingar, 13. og 14. juli, men det kan bli ei ekstraframsyning om interessa er stor, fortel Vestad. 

Folkemusikk, jazz og kyrkjeroing
Det er i hovudsak profesjonelle aktørar som dreg festivalen. Dei som dreg til Kibneb og Lensvik, kan få med seg alt frå folkemusikk til Beatles og sjølvsagt jordbæropera. Per Schanning og andre held folkemusikkonsert, og Kristin Rustad og Female Quartet speler "Mozart på aldersheimen" for dei eldre i kommunen. Gruppa Adamseplene har framsyninga "Full pupp", og ikkje den ikkje ukjende jazzgruppa Urban Connection held konsert. 

Vidare blir det  bestillingskonsert med to unge jazztalent, Håkon Mjåset Johansen og Mats Eilertsen, og ein kurkjekonsert i Rein kyrkje på Rissa. For å komme seg dit må ein ro over Trondheimsfjorden, og denne kyrkjeroinga er ein gammal tradisjon som festivalarrangøren vekkjer til live att.

Grønningen er med i jordbæroperaen
Knut Anders Vestad har fått mye blest kring operaen. Handlinga er lagd til 1958, da den mest intense jordbærperioden tok til i Lensvik. På det meste var det 700 "jordbærtauser" som plukka bær i kommunen! Solistane Anne-Mari Edvardsen og Erik Jacobsen har rollene som prestedottera Jordbær-Liv frå Rissa og odelsguten Arve frå «Øvre Jordberg» i Lensvik. Dei speler eit ungt par som møtest, og det blir søt musikk mellom dei… Den gamle, kjende skiløparen Harald Grønningen blir også å sjå på scena i rolla som seg sjølv.

Sopranen Anne-Mari Edvardsen har nyss imponert trønderane i «Carmina Burana» av Carl Orff, og Erik Jacobsen spelte Judas i «Jesus Christ Superstar». Tekstane dei framfører i "Jordbær-Liv" er skrivne av Kjersti Lie. Ho og komponisten har mellom anna arbeidd med operaen i Firenze, og dei har tidlegare skrive ein bakgardsopera om Bakklandets vakre Maja saman

Musikarar og publikum bur saman
- Festivalen blir avslutta med "Strawberry Fields Forever", eit Beatles-program der alle musikarane på festivalen er med.Bortsett frå kyrkjekonserten på Rissa blir alle tilstellingane haldne omkring i Lensvik. På festivalen blir konsertlokalet Grønn opna i ein gammal lagerhall, og dette skal bli det trøndske svaret på jazzklubben Blå i Oslo, meiner Knut Anders Vestad. Andre konsertar blir haldne i samfunnshuset og på Lensvik kro. I år blir det ikkje konsertar på Kibneb-garden. 

- Noko av det mest spesielle med festivalen er at det er lagt opp til at dei tilreisande, både musikarar og ein god del publikummarar, kan bu saman på Kibneb og hjelpe kvarandre med det praktiske, som det å lage mat. Ein del kan få soveplass i våningshuset på Kibneb-garden, medan andre kan setje opp telt på jorda utafor, fortel Vestad. Det er visst god plass på garden… 

Konsertar der folk bur!
Initiativtakaren kjem frå Fræna i Romsdal, men har røter på festivalstaden Kibneb.

- Oldefar min budde her, og bestefar vart fødd i stua på garden. Denne staden og bygda betyr mye for meg, og eg reiser hit nesten kvar veke frå Trondheim. Eg ønskjer at folk her i Lensvik, som elles i distrikta, skal få oppleve god kultur der dei bur. Korfor må det støtt vere slik at folk ute i distrikta må reise inn til byane for å oppleve gode konsertar og musikalar?

Starta som ein protest
Kibneb-festivalen skal vere mye meir intim enn dei store, institusjonaliserte kulturtilstellingane. Knut Anders Vestad fortel at det heile starta som ein protest. 

- For nokre år sia sende eg inn forslag til prosjekt både til Moldejazz og Vossajazz, som  mange andre unge musikarar gjer, men fekk avslag. For mange unge musikarar verkar det nesten uråd å få sleppe til på dei store festivalane. Der tek dei berre inn kjende namn, og det blir ein kamp om å få PR, publikum og pengestøtte, meiner Vestad. 

I 1997 stelte han til ein jordbær- og lyrikkfestival saman med ein handfull venner som ein reaksjon.Også året etter, i 1998, var festivalen hemmeleg. Da inviterte Knut Anders Vestad enda nokre fleire, fyrst og fremst eigne musikarvenner. Alle budde på garden, laga mat, bar ved og gjorde husarbeid, og heldt konsertar for kvarandre. Men alt skulle gå føre seg som på "ordentlege" festivalar. Programmet var trykt opp, og deltakarane hadde eigne festivalpass. 

- Det var heilt gjennomført, men utan publikum, om vi ser bort frå éin, offentleg kyrkjekonsert. Kyrkja vart stappfull, og da forsto vi at det berre var tull å halde dette hemmeleg, seier festivalgeneralen.

Offentleg suksess i fjor
Trass i at Kibneb-festivalen er så ny at folk flest ikkje har hørt om han, har festivalen alt tradisjon for å presentere nyskrivne verk. I år er det to. Sommaren 1999 var det premiere på barnemusikalen "Krabbe Nilla & Krabbe Darius", som altmoglegmannen Vestad har skrive musikk og tekst til. Da var det også konsertar med Dingo Bates, Poesiorkesteret og Psalmensemblet, og for både musikarar og publikum var festivalen så vellykka at han måtte berre bli enda mindre hemmeleg i år. Og det blir nok ikkje mindre jordbær og folk i Lensvik av det, heller.

Av Jon Peder Vestad

P.S. Artikkelforfattaren er i slekt med Knut Anders Vestad, ja. Vi er syskenbarn.

Artikkelen er skriven ut frå samtalar med Knut Anders Vestad og artiklar i Adresseavisen (sjå lenkjer) og Romsdals Budstikke ("Operamaker fra Aureosen", 26.4. 2000). 

Les meir om Kibneb-festivalen i Adresseavisen: 
Jordbæropera i Lensvik
Kibnebben- en festival verd
Nesten "Kibstock"