Fire år med Vestads vevstad

I midten av mai 1998 kom Vestads vevstad på nettet for fyrste gong. Denne vevstaden for språk, media, litteratur og ymse anna var da plassert hos GeoCities, på adressa www.geocities.com/Athens/Academy/2946. Der ligg stoff frå det fyrste Vevstad-året framleis ute. Dei siste åra har nettstaden vore å finne hos Høgskulen i Volda, på http://www.hivolda.no/jpv. 

Nytt stoff blir lagt ut med ujamne mellomrom, og emna varierer. Det har vorte mye om media og nynorsk, mindre om litteratur og andre interessante emne, for eksempel minoritetsspråk. Eg kunne også ha tenkt meg å leggje ut fleire intervju. Ymseposten, som eigentleg er den delen av nettstaden eg liker best, har vorte forsømt. 

Kvar dag er det +/- ti besøk på Vestads vevstad, og kvar månad er det mellom 200 og 400 som kikkar på sidene. Desse fire åra har Vestads vevstad i alt hatt om lag 13000 besøk, og i tillegg kjem Radioordlista, som lever sitt eige liv på GeoCities og har hatt nesten 1900 besøk av radiointeresserte frå inn- og utland. Dei fleste lesarane kjem sjølvsagt frå Noreg, men nettstaden har også faste lesarar i Sverige, Danmark og Finland. I tillegg kjem det ”slengarar” frå Belgia, Nederland, Storbritannia, USA og andre land.

Eg har fått ein del hyggjelege tilbakemeldingar, og det set eg sjølvsagt pris på. Nettstaden har vorte omtalt i Journalisten, Norsk Tidend og Møre-Nytt, og Stål Talsnes iTV2 nemnde Vestads vevstad da han vart intervjua av ABC Startsiden om internettstader han likte å sjå innom. Slikt gler! I boka tekst.no av Ture Schwebs og Hildegunn Otnes (LNU/Cappelen 2001) er Vestads vevstad nemnt slik: ”Jon Peder Vestads nettsted Vestads vevstad (www.hivolda.no/jpv) er et slags kulturtidsskrift som drøfter språk og litteratur, journalistikk og medier. Leserne inviteres også til å sende inn tekster som Vestad så legger ut på vevsidene sine” (s. 176). Elles kan eg nemne at eg veit av eitt tilfelle der eit pressebyrå brukte ei sak frå vevstaden, utan å vise til kjelde. Etter kvart er det lenkjer frå ganske mange nettstader til sidene mine, medan eg ikkje er like flink til å oppdatere og tilføye aktuelle og interessante lenkjer…

I tida som kjem, blir det lagt ut nytt stoff når eg har tid og ork. Er ein innom eit par gonger i månaden, skulle ein få med seg det meste – eg fjernar jo ingenting… Stoff frå lesarar er eg sjølvsagt interessert i, men mest av alt er eg opptatt av at lesarane skal få glede og nytte av nettstaden.

Jon Peder Vestad, vevvert

Lagt ut på nettet 24. mai 2002